“闲话”专栏，邀您以文会友，闲话人生！聚焦所见所闻所思所感，呈现当下生活状态！
物至于此，
小得盈满；
(相关资料图)
做人门槛，
小满即安。
搿日，跟老朋友一道喫饭，勒一家熟悉的饭店；之前也去过几䠈，印象蛮好。就是搿天回到屋里看看菜单，再回回味道，有点点小窝塞：居然漏上一只菜。也算上过米其林一星光荣榜的饭店，迭能的管理水平让人打只格楞。当然，结账前没有仔细对菜单，错还勒自家，再去寻人家倒扳账也没啥意思。还好，让人有点小满足的是，搿天大部分菜水也算踏勒水平线上的，特别是一只“黑叉烧”，黑里生俏，软糯细腻，滋味绵密。
另外要紧的是，歇仔三年，老朋友一年一聚模式重启，大家满足得勿得了，该讲讲，该笑笑，像煞搿几年里厢啥事体也没发生过。
又是一日，上半天还是阴天，下半天突然就放晴了，阳光灿烂，号扫出门走走，经过小菜场，初夏日脚，新上市的毛豆子正当高光时刻，毛豆壳新绿盈盈，讨人欢喜。看到过一首诗《到哪里能买到两斤毛豆》，写一个生活勒北京的诗人想喫毛豆子的心情：
“只需两斤毛豆，一小撮/别有用心的八角、桂皮、辣椒和花椒，/一斤用于追忆似水年华，一斤用于充当/通往博士的游击路上开小差的干粮。”
还好，阿拉活勒南方，毛豆可以从春夏之交喫到秋冬转季：盐水毛豆，糟毛豆、丝瓜毛豆、酱瓜毛豆、咸菜毛豆、榨菜肉丝毛豆、毛豆冬瓜汤、毛豆子烤肉……
毛豆顶好是现剥现喫，新鲜带层毛衣的，炒出来鲜洁。只不过，剥毛豆子从来就是桩苦差事，手指甲太长要断，太短，用勿出力，勿长勿短的，剥过一趟毛豆子，指甲定规要养好几天。勿晓得啥辰光开始，卖毛豆摊头旁边多仔一只剥毛豆机器，称好份量结账，顺便开机器拿毛豆子剥剥好，一手一脚的事体，真真是没啥好怨天怨地的日脚。
今年小满，是5月21日礼拜天，小满，热天的第二只节气。勿像有种节气，比方讲小雪后头还跟牢大雪。小满后头是没有大满的，所以，小满是节气，也是教拨阿拉一只过日脚门槛：月盈则亏，水太满，要潽出来，做人太满么，肯定勿灵光。
至于啥叫小小满足？喏喏喏，夜饭小菜里，小半碗毛豆子焯酥，两根丝瓜刨皮用盐腌10分钟，汏清爽沥干，开油镬，丝瓜煸到软，毛豆子摆下去一道翻炒均匀，调好咸淡，摆一点点糖提鲜，盛出来一碟油汪汪清亮亮侬中有我我中有侬的丝瓜毛豆——搿就是了。
欣赏更多闲话专栏作品
可点击下图↓↓↓
征文信息
闲话专栏邀请作者加入，以文会友，分享生活点滴，中选文章将发表在该专栏。
有兴趣的作者可发送电子邮件至laoyouxianhua@zhoudaosh.com
邮件标题请务必注明“闲话” ，邮件中请务必留下姓名、手机号码等有效联系方式
作品以千字左右为宜，须是作者原创，并保证拥有该作品完整的知识
如因抄袭、盗用他人作品等情况产权产生著作权纠纷，由作者自行负责
本单位对投稿作品拥有展览展示、刊登发布、结集出版的权利
关键词：
